அழியோவியத்தின் விரல் ரேகைகள்

பின்னூட்டமொன்றை இடுக

உப்பு முத்தங்களை
பகிர்ந்து கொள்கிறவர்களின்
புடைவைகளுக்கு
கைக்குருதியின் வெம்மை கூடிவந்திருக்கிறது

வீழும்தலை எண்ணிக்கைகளை
வீட்டுச்சுவரில்
வரைந்து வைப்பவர்களுக்கு
அழியோவியங்கள் உரித்தாகுகின்றன

யாரோ ஒருத்தி
எதோ கணத்தில்
தெய்வ விரல் கொண்டு
வானத்தில் தன் ரேகைகளை வரைகிறாள்

பிறகு
வானம் யாருக்கும் உரிமையில்லாததாகப் போய்விடுகிறது.
o

சகனின் குழந்தைப்பருவ
புகைப்படத்தை
துப்பட்டாவில் சுருட்டி எடுத்துப்போகிறாள்

சகியின்
புகைப்படத்தை மேஜையில்
சந்தேகம் வராத குழுப்படமாக
வைத்திருப்பவன்
ரகசிய இரவுகளில் கண்ணீரில்
நனைத்துவிடுகிறான்

இருவரும் இணைந்த புகைப்படங்களை
எடுத்தவர்கள் தொடர்பு எல்லைகளிலிருந்து
சொல்ல வார்த்தையற்று விலகிப்போகிறார்கள்

அந்த
கல்லறை அங்கேயே
காலங்காலமாக உறைந்திருக்கிறது
புற்களை முளைக்கவிடாமல்.

o

கண்ணாடிக்குவளையில் போதை
நிரப்பி
நிலவின் பிம்பங்களை
பார்த்துக்கொண்டிருப்பவன்

ஒரு துளி விரல்தொட்டு
சுவைக்கிறான்

பிறகு
அதே நிலாவை முழுவதுமாய்
மூச்சுவிடாமல் கவிழ்த்துக்கொள்கிறான்

மீண்டும் குவளையை நிரப்பும்போது
போதாமைகளில் ஆடிக்கொண்டிருக்கிறது

அதே நிலா

மீன்கள் ஒளிக்கும் பூனைகள்

பின்னூட்டமொன்றை இடுக

இந்தப்பெரு நிலத்தில்

உடலை மண்ணுக்கு கொடுப்பவர்கள்
உப்புக்கடலை நாசிக்கு ஏற்றிக்கொள்கிறவர்கள்
எரி புகையில் இருப்பினை
அழிப்பவர்கள்
ஓடும் நதியில் மிதந்தபடி
இறக்க காத்திருப்பவர்கள்

எல்லாருக்குமான
தேர்வைப்போலவே

எதாவது ஒரு காட்டில்
எதாவது ஒரு மரத்தை

வேர்வரை அழித்து வீழச்செய்யக்கூடும்
ஒரு மலர்.

o

பேரங்காடியின் எல்லா கடைகளையும்
ஒவ்வொன்றாகக் கடந்து

தென்மூலை படிக்கட்டோரத்தில்
குளிர்ந்த கைப்பிடியில்
தலைசாய்த்தபடி

மீண்டும் ஒருமுறை
முகுந்தா முகுந்தா பாடலைக்
கேட்பதற்காக கடல்கடந்து வரும்
இந்த ஒருவனைப்போலவே

எங்கோ ஒரு கடல்மீது

நிழலுடன் பேசியபடி
கண்டங்களைக் கடக்கும் பறவை
வைத்திருக்கக்கூடும்

வரலாற்றுக்காலத்தின் முன் விதையொன்றை.

o

துயரங்களைப் புதைப்பதற்காக
தலையணை இருளை
பரிசளிக்கும்
மனிதர்கள் இன்னும் இருக்கிறார்கள்

இருத்தலினால் அல்ல
பார்த்தலினால் மட்டுமே
அவை இன்னும்
அங்கே இருக்கின்றன
என்றவர்கள் சொல்வதிலும்
உண்மையிருக்கலாம்

ஆனாலும்
அவர்களுக்குச் சொல்வேன்

என் பூனைகள்
ஒளித்துவைக்கும்
மீன்களையும்

அவை அடையாளமிட்டே
வைத்திருக்கின்றன.

என் மடி பிசாசே…

பின்னூட்டமொன்றை இடுக

நம் பிதாக்கள்
பாதைகளை ஒழுங்கு செய்கிறார்கள்
சாத்தான்களிலிருந்து விலக்குகிறார்கள்
வழியற்ற உறுதிமொழிகளை அளிக்கிறார்கள்

நம் சுதன்கள்
உடல் நெருப்புகளை எழுப்புகிறார்கள்
கனவுகளை உருவாக்குகிறார்கள்
பிறழ்வுகளை சொஸ்தப்படுத்துகிறார்கள்

நம் சாத்தான்கள் எளிமையானவர்கள்
யாரையும் விலக்குவதில்லை
எந்த நம்பிக்கையும் அளிப்பதில்லை
பிதாக்களையும்
சுதன்களையும் அறிமுகப்படுத்துகிறார்கள்

இன்னும் ஆழமாக

o

உதறிச் செல்வதற்கு முன்னால்
அரளிப்பூக்கள் இங்கிருந்தே பறிக்கப்பட்டன
மரணத்திற்கு முன்பு
இங்குதான் இருந்தேன்

கைவிடுவதற்கு முன்பு
இறுகப்பற்றியிருந்தேன்

தாவரங்கள் விதையாதவற்கு
முன்னும்
தாவரமாகத்தான் இருந்தது

என் பிரிய சாத்தானே

o

என் இனிய பிதாவே
நான் ஒரு செடி வைத்திருக்கிறேன்
என்னிடம் மலர் இருக்கிறது
நதிகளை நீங்கள் அளித்திருக்கிறீர்கள்

என் பிரிய சுதனே
நம் பானங்கள் புளித்திருக்கின்றன
அளித்த இருக்கைகள் முட்களாயிருக்கிறது
அப்பங்கள் காலியாகிவிட்டன

என் மடி பிசாசே
உன்னை அணைத்துக்கொள்கிறேன்
இந்த ஆசுவாசத்தை முத்தமிடுகிறேன்
நம் கொலைகளை ஆராதிக்கிறேன்
கோப்பைகளை காலிசெய்கிறேன்

என் தற்கொலை இரவே
உன்னையன்றி யாருமின்றி இருக்கிறேன்.

தனியறையில் சில பலூன்கள்

பின்னூட்டமொன்றை இடுக

நட்சத்திரகுறியிட்ட பலூனில்
கழுத்து இறுகும்படி
வானத்தை அடைபவர்களைப் பற்றி
பேச வேண்டியிருக்கிறது

சிறுமுலைத்தெய்வங்களை
தனித்துவிட்ட
கோயில் காப்பாளர்களை
யாராவது கேள்விகேட்கவேண்டியிருக்கிறது

காற்றில் அசையும்
ஒற்றைப்பட்டத்தின் ஆதார நூலை
மண்ணில் சிறுகயிற்றில்
கட்டிப்போகிறவர்களே கொஞ்சம் நில்லுங்கள்

சொல்மட்டுமே இருப்பவர்கள்
யாரும் பார்க்காமல்
எழுதிக்கொண்டிருக்கிறார்கள்

கானகத்தின் இறுதிப்பாடலை.

o

விசேச நாட்களில்
நான் அறைக்கு திரும்ப
விரும்புவதில்லை

அறை மிகவும்
தனியாக இருக்கிறது
விசேச பண்டங்களை விசேசமாக
எனக்கு
சமைக்கத்தெரியாது
தனியே சமைத்து உண்பவர்கள்
தெறிக்கும் தீப்பொறிகளைக் கவனிக்க
மறந்துவிடுகிறார்கள்

மிகுத்துச்செறிந்த வாஞ்சையுடன்
தன் வீட்டு
பண்டங்களைக் கொண்டுவருபவர்கள்
கொஞ்சம்
பரிதாபத்தையும் தட்டில்
வைத்திருக்கிறார்கள்

கூடவே,

விசேச நாட்களில்
யாராவது நினைவுக்கு வந்துவிடுகிறார்கள்

வரக்கூடாதவர்கள் வரும் மாலைகளில்
போகவேண்டியவர்கள் போகாமல்
இருப்பதுதானே நல்லது?

o

ஆம்
நன்னீர் மீன்களை
உயிருடன்
கொதிக்க வைத்திருக்கிறேன்

ஆம்
மெழுகுவர்த்தியை
அறுக்கும்போது கழுத்தை
அறுக்கும் கற்பனையை
உருவாக்கிப்பார்த்திருக்கிறேன்

ஆம்
மரத்து வண்டுகளை
எந்த காரணமும் இன்றி
எரிவிறகில் வெடிக்கும்படி எறிந்திருக்கிறேன்

ஆம்
நாக விசத்தை நேரடியாக
நாவில் வாங்கி
போதமுற்றிருக்கிறேன்

ஆம்
அவ்வப்போது நான்
பிறருக்கான அன்பாக
சில போலி முத்தங்களை பரிசளித்திருக்கிறேன்

மதுக்கிண்ணங்களற்ற இரவு

பின்னூட்டமொன்றை இடுக

எனது மதுக்கிண்ணங்களை
என்னிடமிருந்து
விலக்கி வைக்க நினைக்கிறவர்களுக்கு
நன்றிகள்

நீங்கள்
அறியாத தற்கொலை நாட்களை
இன்று உங்களுக்குச் சொல்வேன்

வீழ்ந்துவிடாதபடி தாங்கிக்கொண்ட
ஒற்றை கால்
கோப்பைகளை
இன்று உங்களுக்கு காட்டுவேன்

ஆழத்து நினைவுகளை
நரம்புகளைச் சுண்டி சுண்டி
அழித்த திரவங்களை
இன்று உங்களுக்கு அருந்தக்கொடுப்பேன்

முன்னதாகச் சொல்லுங்கள்
பல்கூச்சமிருக்கிறதா
ஐஸ் துண்டங்கள் உங்கள் தொண்டைகளுக்கு ஒத்துக்கொள்ளுமா

முடிவில் நீங்கள்
கேள்விகளுக்கு பதில் சொல்லும்
நிலையில் இருக்க மாட்டீர்கள்
என நிச்சயமாக எனக்குத்தெரியும்.

o

இன்றொரு நாள் மட்டும்
உனக்காக
வருந்துவதாயில்லை

இடது உள்ளங்கையில்
முக்கோண ரேகைக்கு
நடுவே
கடைசியாய் முத்தமிட்ட
புள்ளியில் சிகெரெட்டின்
நெருப்புப் பகுதியை
அணைப்பது அத்தனை
பழகிவிட்டது

இன்றொரு நாள்மட்டும்
உன் புகைப்படங்களை
பார்ப்பதாயில்லை

அத்தனை நாடகங்களையும்
நிறுத்திவிட்டு
செயலற்று நிற்கும்
மேடைக்கோமாளியின் முன்

இரண்டு
வாய்ப்புகள் இருக்கின்றன

மேடையிலிருந்து இறங்குவது
மேடையிலிருந்து
குதிப்பது.

o

எனக்கும்
குழப்பமாகத்தான் இருக்கிறது

சிதைக்கிறவர்கள்
சிதைக்கப்படுகிறவர்கள்
சிதைத்துக்கொள்கிறவர்கள்
சிதையவிட்டு விலகிச் செல்கிறவர்கள்

எல்லாரும்
எப்படி
ஒரே மலரை
வெவ்வேறு காலத்தில்
பிடித்திருந்தார்கள்?

பிரேதம் பார்த்தல்

பின்னூட்டமொன்றை இடுக

இத்தனை தொலைவு தாண்டி
அப்பெயரை
அல்லது
அப்பெயரைப்போல் ஒலிக்கும்
ஒரு சொல்லை
கொண்டு சேர்க்கவென்றே
எங்கிருந்தோ
ஒருவன்
வந்திருக்கிறான்

அப்பெயரை தன் கண்ணிலும்
வைத்திருப்பவன்
ஒரு முறை திரும்பிப்பார்க்கிறான்

தன் உடலை
தானே பார்க்கும்
பிரேதம் போல

o

பாழடைந்த கோவில்கள்
கைவிடப்பட்ட
ரயில் நிலையங்கள்
ஆள் நடமாற்றமற்ற
இடுகாட்டுச் சுவர்கள்

உளுத்துச் சரிந்த மரத்தண்டுகள்
பாளம் வெடித்த
வயல்வெளிகள்
நீர்வற்றி துர்நாற்றம் அடங்கிய
நேற்றைய கிணறுகள்

ஒரு கனவிற்கு காத்திருக்கிறேன்
எல்லா
நிஜத்திலிருந்தும் என்னை
எழுப்பிடவிடக்கூடிய
ஒரே ஒரு கனவு

o

எல்லாரும் அடைந்திருக்கிறார்கள்
அதே போன்றதொரு
மஞ்சள் மலரை
தேன்சிட்டு பறவையை
மழை இரவை

எல்லாரும் இழந்திருக்கிறார்கள்
அதே போன்றதொரு
எரி நட்சத்திரத்தை
எழுந்து நின்ற பெருமரத்தை
மிகச்சிறிய அணுக்கமான கூட்டை

யாரோ ஒருவன்
எல்லாருக்குமாய் பெருஞ்சுவற்றில் வரைகிறான்

எல்லாரும் அதே யாரோ ஒருவனைக்காய்
அச்சுவரருகில் காத்திருக்கிறார்கள்.

மலையுச்சியில் விமானங்களைக் கணக்கெடுப்பவள்

பின்னூட்டமொன்றை இடுக

பிதா கைவிரித்து
அழைக்கும்
அம்மலையுச்சியிலிருந்து
தாழப்பறக்கும் விமானங்களை
அவள்
கணக்கெடுத்துக்கொண்டிருக்கிறாள்

பிதாக்கள் கைவிட்ட
தேசத்தின்
நதிக்கரையில்
தாழப்பறக்கும் விமானங்களைக் கண்டு
அவன்
அஞ்சி ஓடுகிறான்

தேவகுமாரர்கள்
காலடியெங்கும் மறைந்திருக்கின்றன
இன்னும்
வெடிக்காத சில நூறு குண்டுகள்.

ஆதியில் காதல் இருந்தது.

o

காணாமல் போனவள்
திரும்பி வந்து கேட்கிறாள்
ஏன் தேடவில்லை என்று
தலை சாய்த்து
மெல்ல உதடசைத்து

தேடல்களில் சலித்தவன்
புன்னகைத்து அமர்ந்திருக்கிறான்
கைகளை இறுக மூடி
பழைய மலர் தெரியாதபடிக்கு

பைசாசங்கள் சடைவிரித்தாடும்
நிலமெங்கும்
ஒளிந்திருக்கிறது
கால் அழுத்தத்தில் வெடிக்கக் காத்திருக்கும்
மருந்து.

o
கைவிளக்கேந்திய தூண் சிற்பப்பெண்ணிற்கு
ஆதுரத்துடன் புருவ மத்தியில்
குங்குமம் இடுபவன்
யாரும் பார்க்காதபோது
முலைதடவிப்பார்க்கிறான்

கைகூப்பி
தனித்து நிற்கும் சிற்பக்குரங்கிடம்
தன் காதலன் பெயரெழுதிய
மாலை அணிவிக்கிறவள்
யாரும் பார்க்காதபோது
ஆங்காரத்துடன்
வெண்ணையை எறிகிறாள்

காலங்காலமாக இதையே
பார்த்திருக்கிறது
அப்பழங்கோயிலில் வீச்சத்தை
உருவாக்கும்
தலைகீழ் பாலூட்டி.

Older Entries Newer Entries

%d bloggers like this: